Gen 10 | SSX | STEP | Mo hande Noana꞉ eiyeke tonu Seme make Ha꞉me make Dieipedi make ika꞉ monduma꞉ monduma꞉ pimiki wekiwandikina꞉ wekiwandikina꞉ bikimanu doe. Mo hande ikali tieke tieke a꞉pa hoki naneta꞉ do weki tepoma꞉ta꞉ weki titi mondu wimikime.

Genesis 10

Noana꞉ eiyeke tonuna꞉ tapake

1 Mo hande Noana꞉ eiyeke tonu Seme make Ha꞉me make Dieipedi make ika꞉ monduma꞉ monduma꞉ pimiki wekiwandikina꞉ wekiwandikina꞉ bikimanu doe. Mo hande ikali tieke tieke a꞉pa hoki naneta꞉ do weki tepoma꞉ta꞉ weki titi mondu wimikime. 2 Mo Dieipedina꞉ eiyeke tonuta꞉ Koma make Meikoko make Madai make Diapani make Diubolo make Meseke make Taitasi makee. Ikita꞉ mo ika꞉ biki kone yano loma꞉ loma꞉ pimiki da wanda꞉halina꞉ apa꞉mei tonue. 3 Mo Komama꞉ kini pea monduma꞉ monduma꞉ pieke wekiwandikina꞉ wekiwandikita꞉ mo A꞉sekena꞉se make Tipa꞉di make Tokama make koto damanu pa꞉ta꞉ haemeke wanda꞉halie.

4 Mo Diapanima꞉ kini pea monduma꞉ monduma꞉ pieke wekiwandikina꞉ wekiwandikita꞉ mo A꞉lisia make Sepeini make Saipotasi make Loa꞉disi make koto da kenkemanu haemeke wanda꞉halie. 5 Ikita꞉ mo dawala tea꞉na꞉ make mo dawala u dupala꞉ kenke sunu pa꞉ta꞉ make pelia haemeke wanda꞉halina꞉ apa꞉meie. Do koto wanda꞉halita꞉ mo Dieipedima꞉ kini pea monduma꞉ monduma꞉ pieke wekiwandikina꞉ wekiwandikie. Ikita꞉ ika꞉ kenke ma꞉nda꞉ ma꞉nda꞉ pa꞉ta꞉manu hao tutu ta꞉ta꞉ ta꞉ta꞉ hao tapake homeke homekema꞉ ika꞉ da pi ta꞉ta꞉ ta꞉ta꞉ lemekeme.

6 Ha꞉mena꞉ eiyeke tonuta꞉ Kusu make Idiepi make Libia make Keinani makee. Ikita꞉ mo ika꞉ biki yano loma꞉ loma꞉ pimiki da wanda꞉halina꞉ apa꞉mei tonue. 7 Mo Kusuma꞉ kini pea monduma꞉ monduma꞉ pieke wekiwandikina꞉ wekiwandikita꞉ mo Siba make Ha꞉pila make Sabita make Lama make Sabeteka make koto da kenkemanu pa꞉ta꞉ haemeke wanda꞉halie. Mo Lamama꞉ kini pea monduma꞉ monduma꞉ pieke wekiwandikina꞉ wekiwandikita꞉ mo Seba pita꞉ Dedani da wanda꞉halie. 8 Kusuma꞉ mo weki biki Nimolodo mondu wiekeme. Koto wekita꞉ do kenkena꞉ titina꞉ a꞉nda꞉ wotu bepolatiki pieke hali hayekeme. 9 Mo Tekehalima꞉ tamba꞉ mina꞉la꞉ ekima꞉ ipikita꞉ mo yapa꞉ eiya꞉ wotu no hayeke hali hayekeme. Koto ekina꞉ yeketa꞉ wanda꞉halima꞉ alota꞉ Tekehalima꞉ neketa꞉ Nimolodo pieke tupa꞉ yapa꞉ eiya꞉ wotu no pele hali hawaena꞉e lo halememe. 10 Nimolodo ipika꞉ titina꞉ kilu tombuao hayeke daoni manuta꞉ Ba꞉biloni make Eleke make Aka꞉de makee. Koto daoni tepota꞉ mo Ba꞉biloni kenke pa꞉ta꞉ haemekeme. 11 Koto kenkena꞉ haota꞉ ipikita꞉ mo A꞉sitia kenke pa꞉ta꞉ pua Ninipa daoni pita꞉ Lihobodi Ia daoni make Kala daoni make 12 kutupa mo Ninipa daoni pita꞉ Kala daoni aneke yaapo tukikina꞉ hala꞉ Leseni daoni make paeyao a꞉eyekeme.

13 Mo Idiepima꞉ kini pea monduma꞉ monduma꞉ pieke wekiwandikina꞉ wekiwandikita꞉ mo Lidia make A꞉namo make Leha꞉be make Na꞉pidu make 14 Pa꞉dutusi make Ka꞉solu make mo Pilisidaini wanda꞉hali kini pa꞉la꞉ da Ka꞉podo make koto da wanda꞉hali yekeme.

15 Mo hande Keinanina꞉ eiyeke tonuta꞉ mupeke weki Saidoni make Hedi makee. Ipilikita꞉ mo ipilika꞉ biki yano loma꞉ loma꞉ pimiki da wanda꞉halina꞉ apa꞉meie. 16 Keinani ombuta꞉ mo Diebasi wanda꞉hali make A꞉mo wanda꞉hali make Keakasi wanda꞉hali make 17 Hipai wanda꞉hali make Aki wanda꞉hali make Sini wanda꞉hali make 18 Apa꞉de wanda꞉hali make Sema wanda꞉hali make Ha꞉mode wanda꞉hali make koto wanda꞉hali paeya tapao sikina꞉ apa꞉mei hayekeme.

Mo Keinani wanda꞉hali tutu ta꞉ta꞉ ta꞉ta꞉ putupulu bao puata꞉ 19 ikana꞉ma꞉ yu tombo kini piki hauta꞉ mo Saidoni da nepoko nane kini pea pua mo Kasa da nanema꞉ tilao Kita da puata꞉ mo Laasa nanema꞉ tilao Sodomo make Komota make A꞉dema make Seboimi da manuna꞉ nate opa꞉la꞉ nanema꞉ tilao pua u naemekeme. 20 Mo Ha꞉mema꞉ kini pea monduma꞉ monduma꞉ pieke wekiwandikina꞉ wekiwandikita꞉ ika꞉ tutu ta꞉ta꞉ ta꞉ta꞉ pa꞉ta꞉ make kenke ta꞉ta꞉ ta꞉ta꞉ pa꞉ta꞉ make hata꞉ta꞉ tapake homeke homekena꞉ ika꞉ pita꞉ ta꞉ta꞉ ta꞉ta꞉ lemekeme.

21 Mo hande Dieipedina꞉ hameke titina꞉ weki Semeta꞉ mo Hibulu wanda꞉hali paeyaona꞉ apa꞉mei yekeme. 22 Semena꞉ eiyeke titita꞉ Ila꞉me make A꞉sia make Apa꞉kesade make Ludu make Atamo makee. Ikita꞉ mo ika꞉ biki kone yano loma꞉ loma꞉ pimiki da wanda꞉halina꞉ apa꞉mei tonue. 23 Mo Atamoma꞉ kini pea monduma꞉ monduma꞉ pieke wekiwandikina꞉ wekiwandikita꞉ mo Usu make Hulu make Keta make Meseke make koto damanu pa꞉ta꞉ haemeke wanda꞉halie. 24 Apa꞉kesadeta꞉ Silana꞉ ateke yekeme. Kutupa Silata꞉ Ebena꞉ ateke yekeme.

25 Ebeta꞉ weki yaapo mondu wiekeme. Weki ma꞉nda꞉na꞉ bikita꞉ Peleke leeke ekita꞉ mo weki ipika꞉ hayeke natena꞉ta꞉ do kenkena꞉ haemeke wanda꞉halita꞉ putupa꞉ alualu pieke handa leekeme. Kutupa weki ma꞉nda꞉na꞉ bikita꞉ Diokotani leekeme. 26 Mo Diokotanima꞉ kini pea monduma꞉ monduma꞉ pieke wekiwandikina꞉ wekiwandikita꞉ mo Amoda꞉di make Selepe make Ha꞉samapede make Dieta make 27 Ha꞉dotamo make Usalo make Dikila make 28 Obalo make Abima꞉elo make Siba make 29 Opa make Ha꞉pila make Dioba꞉be make koto damanu pa꞉ta꞉ haemeke wanda꞉halie. Iki paeyaota꞉ Diokotanima꞉ kini pea monduma꞉ monduma꞉ pieke wekiwandikina꞉ wekiwandikie. 30 Mo tapake pelieke kenketa꞉ mo Mesa kenkena꞉ hao pua ota꞉ mo Sepa kenkena꞉ nate opa꞉la꞉ nane tumiki eli wieke kenke pa꞉ta꞉manu haemekeme. 31 Do alo tapaketa꞉ Semema꞉ kini pea monduma꞉ monduma꞉ pieke wekiwandikina꞉ wekiwandikie. Ikita꞉ tutu ta꞉ta꞉ ta꞉ta꞉ pa꞉ta꞉ make kenke ta꞉ta꞉ ta꞉ta꞉ pa꞉ta꞉ hata꞉ta꞉ tapake homeke homekema꞉ta꞉ ika꞉ pita꞉ ta꞉ta꞉ ta꞉ta꞉ lemekeme.

32 Koto wanda꞉hali paeyao sikita꞉ Noama꞉ kini pea monduma꞉ monduma꞉ pieke wekiwandikina꞉ wekiwandikie. Kutupa ika꞉ kenke ma꞉nda꞉ ma꞉nda꞉na꞉ hatia epelemeeki maketa꞉ ika꞉ ta꞉ta꞉ ta꞉ta꞉ lo monduma꞉ monduma꞉ pieke tupa꞉ kone hatia epelememe. Mo ikali tieke tieke paeyeke hoki naneta꞉ do kenke ma꞉nda꞉ ma꞉nda꞉na꞉ hala꞉ wanda꞉halita꞉ mo Noana꞉ eiyeketonu pa꞉ta꞉ kini pea epemeke wanda꞉halie.